ميمر
.
.
.

حسين المهم عوف الناس .. كل واحد وترتيــبه
***
يامن حــياتك خلصت بــس عاشور
فرزن حچـــي المشهور والمامشهور
باللـــب تمـسك مايفـــيدن لگـــشور
عوف الگشر ثق ايطير .. بنسمة هوه ابــلا ريبه

***
مالك علاقــه بالحچــي المايــسوه
الدنيه تخض بالناس مثل الشچوه
المابـــيها چـَلـب زيــن صدگ يهوه
والچـَـلب ابــغير حسين .. يوگع ابـــير الريـبــه

***

الزم احسين وعوف احزاب الناس
صدگني تبــقه دوم مـرفوع الراس
من تنســئل گلــهم بحــزب العباس
انياله الذي اويه العباس .. صاير صدگ تنــسيبه

***

مرجعـك قــدسه وافــخـر بتــقــديسه
بــس بالك انته اويه الحسـين اتقيسه
ايصــير الحواري اتقــارنه وي عيــسى
طاري المراجع ممنوع .. بالشين انته تجيبه


***

يامـــن لبـــو السجــاد دمــعاتك ســـيل
طبــع النـــهار اتخـــذه لـــتداني اللـــيل
احسب احساب السحگة اضلوعه الخيل
مرات بعص الكلمات .. گلــب ابو اليمه اتصــيبه

***

الحگ انتميــله والـــزم ابطـــاريه
وخليــك حــر وعـــوف العـبوديه
حسين اعله مـودك جــثته مدميه
ولجلك بذل عالتربان .. اطفال وشباب وشيبه

***

ردت انه اذكــر للـذي ناسيــها
الهامات لوله احـسين منعليها
لجــلك ولجلي زينــبه سابيها
حتى نعيش ابهالخير .. وننسه الزمن تعذيبه

****

اشگد بيه رحم ملاچنه وهالملاچ
كل مايدفعونه اعــله بــابه نرتاچ
اشما ردنه منه مايــردنه الشــباچ
خيره يفيض اعله الناس .. ماينتــــهي ثاريبه
***
حيدر تركي الكربلائي

أنا أتشارك 'ميمر جديد' معك

دينــي الحسـين وبالفخر .. ثابــت يقيني
ولو ينــگطع منــي النـحر .. مابـدله ديني
اليشوف / حبــه وغرامه
يعـــوف / حچيّ الملامه
 
***
 
اليتصــيد بـماي العـــكـر .. كلما شهــر حـزني يمر
يرجعلي بسطوره
كلماته احس متروسه سم .. صفحات التحركه وهم
صفحات مأجوره
بســم التحـــضر يـــدعي .. يحچـي وكأنه مرجعي
وعاشوري عاشوره
گـــتله تنـــحه وســـتجن .. عـــن الشعائر والحزن
شغلـــتنه مخطوره
 
ناس احنه جننه العشگ .. عدنه قضيه
ازغرنه بالحــب محتــرگ .. بالغاضريه
التطوف / نار بخيامه
يعوف / حجي الملامه
 
***
 
صدري امن الطمه ينهضم .. كأنه بصدره اللطم
اتصوره ناسي
الدسـتور شرعلي البچي  .. متكلي المن هالحجي
مو صدعت راسي
ديـــنك الـــك وانــه الي .. دين الحسين ابن علي
ومرجعي عباسي
عبـاس تاجــي وافتخــر .. بالتــــاج هــذا انتصر
بي حررت ناسي
 
بالفتوه اول من نهـــض .. اهل المجالس
بنحورنه الدين انحفظ .. واحدنه عابس
اليروف / جرحه بكلامه
يعــوف / حچي الملامه
 
***
 
حچيّ الملامه اشما كثر .. ما ابتــعد عـــن النــحر
والنوح والدمعه
باقي اعله عهدي وللابد .. بگماطي ونطيت العهد
للمهدي والبضعه
شــهر الدمــع والــعاطفه .. لا مــو شهـر للفلسفه
التــنظير منــسمه
بالدين يحجي وينشرح..والمشكله فرض الصبح
مايدري جم ركعه
 
بيــن الثـــقافه والخـــيم .. ماكو مسافه
معروف عد اهل الشيم .. اصل الثقافه
الشغوف / بحب الامامه
يعــوف / حچي الملامه
 
***
 
ناس احنه مبدئنه العشگ .. وحسين بس حبنه الصدگ
والباري هيچ اوجب
نـطبر ونمشــي عالجــمر .. ركضــة طــويريج الظهر
نركض مثل زينب
ماعدنه اصــلن كل ذنـــب .. الرايــد يهــذبنه يجــــب
افعالــه تتــهذب
الخايف على المذهب عمر .. رأس الــسنه لمــن تـمر
خيخاف عالمذهب
 
بينه ثنعش طبرة شمر .. والمهدي يشهد
والگــلبه متوگـد جــمر .. لتـــضنه يبــرد
الرؤوف / وغصه بمنامه
يعــــوف / حچـي الملامه
 
***
 
المامچوي كلبه بكـــربله .. لايحچــي ابــد بالمــو اله
ممنوع يتـــدخل
الاحساسه بالطف منسلب .. كل ما يمر طاري العذب
اعضائه تتخلخل
الحزب الحسين انه انتسب .. واتفــاخر بهــذا الحزب
حزب الحسين افضل
عندي سياسه بالجـــزع .. واحـــزاني هــذي موبدع
احزاني مال اول
 
الركضة رقيـه بكربله .. بذيـج الظهاري
تفزز جروحي الخامله .. وتوجلي ناري
العطوف / والبي كرامه
يعوف / حچي الملامه
 
***
 
لودنيـتي تظــكني بعــسر .. بالخدمه مادور عذر
هالخدمه قدسيه
صرختي تبقى بكل عصر .. وبكل زمان الي يمر
صرخه حسينيه
يوم السبي اكبر جــرح .. طاريه بــجروحي ملح
وجروحي مسبيه
المايوجعه طـاري الهزل  .. ليــزور ابد ابوالفضل
لعمال بالـــنيــه
 
انياله اليلچمه كل وكت .. طاري الخرابه
الدمعاته بخـدوده تكـت .. عارف مصابه
الضروف / عنـده بكلامه
يعـــوف / حچي الملامه
*
حيدر تركي الكربلائي
 

أنا أتشارك 'ديني الحسين' معك

شور
.
.


معيشني بجروحك وطن .. منسيني آلام الزمن
يا اغله محــبوب ** بعــيوني مكتوب
مسويني سلطان ** بس انته مسلوب

------------

ابابك الي كبر   ايشم عبيرك نحر
 ويستلذ بالسهر   الانته موضوعه
الراحته بكربله   كلشي مايحله اله
والذي يسأله    تجاوب ادموعه
 
يا اول عطش عايش وسط هالروح
الماي بغيبتك گـدامي احس مذبوح
اذا مـوجرحي انتــه المنــه اكولن آه
ثق وداعتــك ماگــول ابـــد مجروح
 
منك تعلمت الالم .. يالنابت بنحرك سهم
خليني مصيوب ** بعيوني مكتوب
مسويني سلطان ** بس انته مسلوب

------------

بحظرتك من امر    ما ادور اجر
ردت بس انكسر   يم جراحاتك
يا امير الهوه   الدمعه يمك دوه
البيه جمر نينوه   بيه معاناتك
 
يمك من يطـــب يتنـــفس المخـــنوگ
اذن حقي اذا ابشخصك اضل محروگ
مالايگ عــــــليه الحب يبعـــد العـــين
وبس حبك احسنـــه عــــليه ايــــلوگ
 
يمك واحس اشتاگ الك .. شحال اليفارگ منزلك
والحـَبك ايذوب ** بعيوني مكتوب
مسويني سلطان ** بس انته مسلوب

----------

اوياك اسولف همس   والعذر التمس
يالنمت بالشمس   حزنك ارزقني
بگلبي حزنك نبع   النحرك الي نگطع
سيدي وللجزع   انته وفقني
 
اريد اوياك اعيشن عـــيشة الباكين
حزنك دين واتشرف انــــه بهالدين
احسين انته انتمائي واكتفي مولاي
وبدون ابقه ضــايع سيدي يحسين
 
مايحتوي فضلك شكر.. لو اشكرك كل هالعمر
وابقه انه مطلوب ** بعيوني مكتوب
مسويني سلطان ** بس انته مسلوب
--------
حيدر تركي الكربلائي
 

 مقدمة ليلة العليله
.
.
.

جــرح جــرح     اتلمس
رمـــح رمـــح     اتنفس
من الحبيب شو أيس
دلـــيلي
*

شوگ المنتـــظر خـلـه .. شوگه ايغطي عالعله
والفارگ هـــوى احـبابه .. الموت ابساع يندله
دمعي بخدي ضل يحفر .. وعـلتي بيها مافكر
حايط بيتنه امن النوح .. گمت الخاطره اكسر
 
خفت خفت     بحــلامي
شفت شفت     خد دامي
وشفاه ابوي تتيبس
دليـــلي

*

كل مغربيه من اختــنگ  .. يابـــــاب يابـــويـه ادگ
شوغاتي يعرفـــها الـذي .. امن الفرگه گلبه محترگ
الوادم وراكـــم سافـــرت .. ردت وشـــــو متأخرت
لا عطش من عدهم طفل .. ولا حرمه منهم انسبت
 
الـــم الـــم       روحتكم
سهم سهم       فرگـتكم
ومن الغياب يتحسس
دليلي

*

قاروره عند ام سلمه .. بيها التراب اصبح دمه
من هاي منك ايسـت .. ماتـــرد يابـــن فاطـمه
الوادم تگلـي اتفائلي .. سالــم يرد بلـكي الولي
وگلبي يگلــي بكربله .. مكطوع راسه أبو علي
 
رسم رسم      من خلي
حلـم حــلم      يرجعلي
عليه خيول تتمردس
دليلي

*

ريت السوالف تـنسمع .. وللطــف يوصلون الدمع
بلكت تطيح اعله الابو .. وتداوي من عنده الضلع
بدمع العليله اكتـب اله .. هـــجرانـــه ما اتـــحمله
ونـچان مايگدر يجــي .. انــــه اعتــــنيله الكربله
 
اروح اروح        بــــالامي
ونوح انوح        عالضامي
ويشوفه ظهري تقوس
دليلي

*

محزونه كاتلني الهضــم .. لـحـزاني مااگـــدر اضم
مشـتاگه اقـــبل لحـيته .. ومشـتاگه لچـفوفه اشم
الحنــيه خــاف امطشــره .. مـن والدي فوگ الثره
وچي صدره منها ممتـلي .. الخيل انتزعها بحافره
 
صدر صـدر    متكسر
عطر عطر     متطشر
عله الترب يتخمس
دليلي
*
حيدر تركي الكربلائي

أنا أتشارك 'جرح جرح' معك

قصيدة العليله
.
.
.

عالمحامل صافنه واكـسر الخاطر
ياتــرى هـــل انـــي ويـاهم اسافر
شـــو سكته ما گــالولي ويانه تـــروحين
ماتحــمل الفرگه العـمــرها حفنت اسنين
واكسر الخاطر
 
***
 
اصــد لوجـوه اهلــي وبـوشــلت عيناي
عليله والحچي اويه اهل المروه اهواي
مــر مـن يمــي ابـوي وقـدمــتله المــاي
گلــت بلكــي يگـلـي يلله امــشي اوياي
 
وبهالـــثنــا وگفـــت اويــانه رقــيه
تگلي يالله ستعجلي وتسحب بديه
طاحت ادموعي وگالت اشعندچ تنوحين
ماتحــمل الفرگه العمــرها حــفنـت سنين
واكسر الخاطر
 
***
 
يقســمون المحــامل وانـــه اتنوع
وصاحو بالاسماء واسمي مااسمع
افرفح گــمت يـــم الباب وتلـــوع
اويــاهم مـــااروح ابهــاي ما اقنع
 
خل راوحن اسئل سكينه ليش اعاني
بسمــي يمكن صاحو وماسامعــه اني
كلتـــلها اذا طاري العلــيله انتـــي تسمعين
ماتحــمل الفرگــه العمرها حفنــت سنـــين
واكسر الخاطر
 
***
 
قريـت عيونهم بعـيون خجلانه
وعرفت حـچاية المتـروح ويانه
طحت بالگاع چني ورده ذبـلانه
ورأساً أصبحت چـن انه مـو انه
 
اتطـشرت عالگاع مابـين المحامل
ولمني بحضانه الـحنينه ابوفاضل
يگــلي يعــمي الكــربله لا ماتـــگــدرين
ماتحمل الفرگــه العمرها حفنــت سنين
واكسر الخاطر
 
***
 
ضعنهـم بده تــوه اتگـوطر احموله
بهالحـــاله وانــه بفــكاري مشـغوله
معــقوله هلــي يخــلونــي معـــلوله
صحت يهل الرحم عفتوني معقوله
 
فـــي امـــان الله لمـــن گـــالـولي همه
بعيني احس الدنيا شو أصبحت ضلمه
فكـــرتـــو بـــيه مـن رحلـــتوا يالمضعنين
ماتحمــل الفرگــه العــمرها حفــنت سنين
واكسر الخاطر
 
***
 
رحت يم عمتي لكن استحي اسئلها
حرت مدري اگلـــها مــدري مـا اگلها
وي ما وصـل جــدمي بكـتر محملها
حــيه عالسفـــر لـــن نـــاده كــافلها
 
المحمل البي عمتي بعلو الثريه
عمه عمه صحت ماصدت عليه
ماسمعته صوتي يوسفه اخت الحسين
ماتحمل الفرگـه العــمرها حفنت سنين
واكسر الخاطر
*
حيدر تركي الكربلائي

أنا أتشارك 'عالمحامل صافنه' معك

نزلة ليلة العليله
.
.
.


الينتظر امامه      ايردله بالسلامه
ايقلد العليله
***
 
الينتظر مولاه الحجه ابن الحسن
يخلي عينه بعيـن المضيعه ضعن
انتظــرته لحد ما نواظرها انطفن
متانيــه مهــديها يرجــع للــوطن
 
والله مو بعيده      طلعته الرشيده
ومومستحيله
 
***
 
المنتظر مهديه واجب ان يكون
كالذي فارگت والــدها الحـنـون
الفلســفه هــاذي لقـومن يعقلون
ومالــنه شغــله ابشـر لا يفقهون
 
كون كل مكلف    شايل بگلبه الطف
ايعيش بسبيله
 
***
 
يامــن الـــسانك ببـــوصــالح لهج
بـــــنتـــظارك بالـــك ادور حجــج
صير شمعه تذوب كي تنطي وهج
وگـــول اللــهــم عجـــلـــه الفــرج
 
بهالامر گلوله    القلد المعلوله
صاحب طويله
 
***
 
افضل الاعمال هـــوه الانــتظار
حالنه حــال العليلــه بأختــصار
المــامچوه بالبـعــد ليگــول حار
شحال البدلاله صار الشــوگ نار
 
الكل حياته ندبه      شوگه من يكتبه
بدمعه الخليله
 
***
 
علمتنه فاطمه بنــت الحــسين
شلون حجة الله ننتظره بيقين
المهدي جنـــة لأنــاس صابرين
ادخــــلوهـا بــسلامـــاً امنـــين
 
والبمــامه هــايم     يسجل اسمه القائم
ويدخل دليله
 
***
 
من امتـلت ارض المديــنه بالصــياح
وكلشي بيها اويه العليله  بحزنه ناح
حقها تبـــچي فاطمـــه ليــل وصباح
راس مهديها انرفـــع فـــوگ الرمـاح
 
ابن حذلم اعلن      والدموع اتبدن
بونه ثكيله
 
***
 
احنــه غايبـــنه نعم شخصــه تأخر
لجن غايــبها علـــه الغبـــره تعـــفر
بخيل عشره صــدر أبو اليمه تكسر
وضل ثلاث أيام جسم حسين بالبر
 
منذبح واليها       ياهو اليسليها
والتشتكيله
*
حيدر تركي الكربلائي

أنا أتشارك 'ايقلد العليله' معك

گعده .. ليلة ام البنين
.
.
.

باچر ابيوم القيامه تعلمون
يــوم لايــنـفعُ مــالً وبنون
نـعـم إلا من آتــى بحــب الحسيــن
علمــتــنه هــالـــدرس ام البــنيـــن
واليخدمه فاطمه اتسويه ملك
***

عالم الخدمه الجليله التتسم بيها القصيده
مبتدأها مرءه طيـبه فاهمه وحره ورشيده
علمتنه ننـطي كلشي لجل الحسـين بعقيده
الخادم وجــوباً بل يجــب .. لحسين لمــن ينتـسب
ايعوف انتمائه الكل حزب .. حزب الحسين اليفيده

الخدمه اولها انتمائك للشهيد
واول الخـدم ابو فـاضل اكيد
فايز ابهـــذا الحچي العــنده يـقيـن
علمـــتــنه هـالــــدرس ام الـــبنــين
واليخدمه فاطمه تسويه ملك

***

الخدمه هــنياله يوادم كـــل شــخص بيها تبـَحر
معرفـه ايــريدلها تــشبه معــرفة سيــدنــا قمــبر
الراد يكــبر كــون يــزغر من يمر طاري ابو الاكبر
المــاقــــلد ام الاربــعـــه .. وبالـــخدمه دور منــفعه
ايضل عايش ابهالقوقعه .. وحجمه يم الزهره يزغر

والتواضــع يرفــع الــخادم مقـام
انياله كــل واحد رضه عنه الامام
المهم نرضي احسين ابو گلب الحنين
علمــتنـــــه هــالــــدرس ام الــبنـــين
واليخدمه فاطمه تسويه ملك

***

الخادم الصــح كون يبذل بالفعل مو فقط كلمه
كون مثل ام البنين الينطي من ينطي ابو اليمه
الخدمه لو من چعب گلبك هيه لو لتگول خدمه
مـــن كربله اتعــلم درس .. وعــباس من دوره اقتبــس
ظل صــير لتمثل الشمس .. خـاف تچوي حسين جسمه

يامن الخدمه اصنعـت منك امير
كون ماتنسه الــبقه فوگ الهجير
ناكـــر المعــروف يــعني ابلايه دين
علمـــتنــه هالــدرس ام البـــنـــــين
واليخدمه فاطمه اتسوي ملك

***

الرايد ايقلدله مرجع يبحـث اعله الاعلميه
الرايد ايقلدله خادم تره مو صعبه القضيه
للخدم ام البــنين اتكــون هيــه المـرجعيه
قلدها يالخادم صدگ .. توصل مراحل بالعشگ
بطاري المخيم تحترگ .. من يمر طاري السبيه
كون بين الناس انته اشـما تكون
فايز اليعمي على احسين العيون
والبچــاله عـــنـــدَ ذي العرشِ مكين
علمـــتــــنه هــالـــدرس ام البــــنين
واليخدمه فاطمه تسوي ملك

***

عيش ايامك ولكن عيش بنـفـاس المواكب
واليدليك اعله دمعه صيرله مثــل الگـرايب
واخذ من حزن العفيفه الطاهره ام الاطايب
وانحب نحيب الثـــاكله .. وخدك بدمـــعك بـــلله
لجـــل الذبيح ابكـــربله .. الظل ثــلاثه عالترايب
عيـــش ايامـــك كـــأنـــك بالـــطـــــفوف
وشوفت جسم احسينك اتگطعه السيوف
مو كئيب الناس گول الهم حزين
علــــمتــنه هالــدرس ام البـــنين
واليخدمه فاطمه اتسوي ملك
***
حيدر تركي الكربلائي
 
 

أنا أتشارك 'يوم لاينفع مال وبنون' معك